Kontakt og bestilling
Kunstløype i Nordfjord og søre Sunnmøre
Ni galleri i ytre Nordfjord og søre Sunnmøre går saman om ei kunstløype, der interesserte kan få med seg fleire kunstopplevingar på same dagen, om dei legg vegen ut mot havet.
- Vi starta med kunstløypa i påska og fekk mange gode tilbakemeldingar. No utvidar vi med to galleri til, og held fram med kunstløype heile sommaren, seier Torkjell Djupedal i Doktorgarden i Selje.
Dei ni galleria som er med i kunstløypa ligg i kommunane Eid, Bremanger, Vågsøy, Selje og Vanylven. I Eid ligg Kulturhuset Gamlebanken på Nordfjordeid og Holmøy arbeidsskule ved Hornindalsvatnet. I Kalvåg ligg Galleri Frøya og i Vågsøy er det utstilling på Vågsberget. Selje har både Atelier Amdam, BickBlikk og Galleri Salen i Doktorgarden. I Syvde ligg Galleri Brødrene Vik, og Hakallegarden ligg på Hakallestranda.
Galleria viser fram både oljemåleri, akvarellar, grafikk, teikningar, foto, keramikk, glas, skulpturar og smijernskunst. Her er alle slags uttrykk og teknikkar. Mange av kunstnarane høyrer heime på Vestlandet.
- Ved å gå saman på denne måten håper vi fleire oppdagar galleria våre. Ein treng ikkje dra til Roma for å dra på "kunstreise", seier Djupedal.
